2Th 3 | GAM | STEP | Agana ambana kambono, na kandja ta para paro. Ye kamang ye God auneke, une no amblo pille dje aundaka, Iwa Kerman kandjiye ola dje pa wai dje pundaka, ye God kandjiye pille pla yenj mal embe, una para aike pille pla yene.

2 Thessalonians 3

Pol, ye no pille kamang ye God aume dji

1 Agana ambana kambono, na kandja ta para paro. Ye kamang ye God auneke, une no amblo pille dje aundaka, Iwa Kerman kandjiye ola dje pa wai dje pundaka, ye God kandjiye pille pla yenj mal embe, una para aike pille pla yene. 2 Ye kamang yeneke, God no una nomane ke pai una ne, singare ke yenj una aglene al i woro aunda. Ye kaninj, una porapora Krais we dje pillgi nadjinj. 3 Ba Iwa Kerman moro ge une kandja djindo mal kaima yendo una moro. Une ye kantau ye awo, yembe dongall bolo aundaka, Satan ye abiyo dje yenda man panda. 4 No kandja djipin mal ye embe yei. Alla are ye embe ye molo pine dje no Iwa Kerman boll pillgi djinmon. 5 Iwa Kerman ye wordaka, une ye wopake kando mal ge ne, ye Krais yembe al imb kake pa moye ge, ye kanpol to, pille kane ye moye.

Tesalonaika una kogo yembon dje nayenj ge una man dje aune

6 Agana ambana kambono, nono Iwa Kerman Jisas Krais kandiye al no kandja dongall dje ye aunmon. Nono agane ta molo no kandja dje ye aupin mal mop awo, kogo naye, kollumb ke wanmoya ge, ye une boll aike nawanne, ellke moye. 7 No kogo ye wane mopin, ye kani mal, karkar yene. Asa no ye boll molo yepin ge kiwa ye namopin, man. 8 Ye kwa mokna i awi nopin ge no ye top to i nopin. Imina armina kogo sip dje ye pagle, ye imb awo djimbon dje yepin. 9 Ye kwa mokna kiwa i nopinka kune yeika ba, no embe nayepin. No kogo embe yepin ge, ye kane karkar yene dje yepin. 10 Ye kaninj, no ye boll mopin kune, no kandja embe mal dje worpin pai. Una ta kogo nayenda ge ye kwa naune. 11 Ba ipon una dji pirmon, ye una pende ami dje kiwa molo, kogo kaima ta nayenj. Ga una djell wal ye no molo pa yenj mal pille kandjambe to mor ba, ga kogone man. 12 Una embe yenj ge, no Iwa Kerman Jisas Krais kandjiye al kandja dongall dje awo embe djinmon, ga yene ami wopake dje molo, yenekne kogo yene al ge kwa mokna panda i no moye we djinmon.

13 Agana ambana kambono, ye ege ege singare du dje paro mal ye pa moye. 14 No kandja pepa al bormon ge una ta karkar nayenda ge ye kanpol to molo, une boll aike nawanne. Ye embe yeneke une singare yendo mal kane ngandjill goya. 15 Iwa ge una kunda yem una mal embe ye aune dje pille nadjinmon, man. Ye iwa ge ye agane mal moro dje kane, une asa yei mal ge, ye djinda dje pille man dje aune.

Pol ga wopake we dje awi

16 Alla ipon, Iwa Kerman nono ellne tukne arngan ye aundo iwa ge, une ye wordaka, wal porapora wonda al ge, ye ellne tukne ege ege arngan panda moye. Iwa Kerman ye boll moya. 17 Na pepa ipon bolo wopake we dje ye aundo ge, na Pol, nanam aglena al pepa boro. Na mon embe boro ge, ye kane Pol yene boi we dje kanne. 18 Nono Iwa Kerman Jisas Krais wandill golo aundo me ge ye boll porapora panda molme.